Məzənnə fərqindən yaranan gəlir və ya
xərc vergi məcəlləsinin 69.2 maddəsinə əsasən Mərkəzi Bankın idxal və ödəniş
tarixlərindəki məzənnələrinə nisbətən hesablanır. Həmçinin, məzənnə fərqindən
gəlir və ya xərc Mənfəət/Gəlir Vergisi Bəyannaməsində öz əksini tapır.
Məzənnə fərqindən gəlirin/xərcin
yaranmasını misal üzərindən izah edək:
A şirkəti 15.06.2021 tarixində
xaricdən, dəyəri 10 000$ olan mal idxal edib. 15.06.2021 tarixinə dolların
Mərkəzi Bank tərəfindən təyin etdiyi məzənnə 1.7 manatdır. Lakin malların
dəyərinin ödənişi 15.12.2021 tarixində icra olunub və bu tarixdə 1 dollar üçün
Mərkəzi Bank tərəfindən təyin olunmuş məzənnə 1.71 manatdır. Yəni malı əldə
edərkən malın dəyəri, 10 000$*1.7=17 000 manat, malın dəyərinin ödənildiyi
tarixdə isə 10 000$*1.71=17 100 manat. Yəni, 10 000$-lıq malın dəyəri aldığımız
gün üçün 17 000 manat idisə, ödəniş edərkən 17 100 manat olmuşdur ki, bu zaman
əlavə 100 manat ödənilmiş oldu. Və bu məbləğ məzənnə fərqindən yaranan xərc
sayılır. Əks halda isə, məzənnə fərqindən gəlir sayılır ( idxal zamanı
məzənnə-1.71, ödəniş zamanı məzənnə-1.7).
